ham ko kisake Gam ne maaraa ye kahaanii phir sahii - Masroor Anwar

ham ko kisake Gam ne maaraa ye kahaanii phir sahii
kisane to.Daa dil hamaaraa ye kahaanii phir sahii

dil ke luTane kaa sabab puuchho na sab ke saamane
naam aayegaa tumhaaraa ye kahaanii phir sahii

nafarato.n ke tiir khaa kar dosto.n ke shahar me.n
ham ne kis kis ko pukaaraa ye kahaanii phir sahii

kyaa bataaye.n pyaar kii baazii vafaa kii raah me.n
kaun jiitaa kaun haaraa ye kahaanii phir sahii

hangaamaa hai kyuu.N barpaa tho.Dii sii jo pii lii hai - Akbar Allahabadi

hangaamaa hai kyuu.N barpaa tho.Dii sii jo pii lii hai
Daakaa to nahii.n Daalaa chorii to nahii.n kii hai

naa-tajurbaakaarii se vaa_iz kii ye baate.n hai.n
is rang ko kyaa jaane puuchho to kabhii pii hai

us mai se nahii.n matalab dil jis se hai begaanaa
maqasuud hai us mai se dil hii me.n jo khi.nchatii hai

vaa.N dil me.n ki sadame do yaa.N jii me.n ke sab sah lo
un kaa bhii ajab dil hai meraa bhii ajab jii hai

har zarraa chamakataa hai anavaar-e-ilaahii se
har saa.Ns ye kahatii hai ham hai.n to Khudaa bhii hai

suuraj me.n lage dhabbaa fitarat ke karishme hai.n
but ham ko kahe kaafir allaah kii marzii hai

muhabbat karane vaale kam na ho.nge - Hafeez Hoshiarpuri

muhabbat karane vaale kam na ho.nge
terii mahafil me.n lekin ham na ho.nge

zamaane bhar ke Gam yaa ik teraa Gam
ye Gam hogaa to kitane Gam na ho.nge

dilo.n kii uljhane ba.Dhatii rahe.ngii
agar kuchh mashvare baaham na ho.nge

agar tuu itefaaqan mil bhii jaaye
terii furqat ke sadame kam na ho.nge

aashiyaane kii baat karate ho - Javed Qureshi

aashiyaane kii baat karate ho
dil jalaane kii baat karate ho

saarii duniyaa ke ranj-o-Gam de kar
muskuraane kii baat karate ho

ham ko apanii Khabar nahii.n yaaro
tum zamaane kii baat karate ho

zikr meraa sunaa to chi.D ke kahaa
kis diivaane kii baat karate ho

hadasaa thaa guzar gayaa hogaa
kis ke jaane kii baat karate ho

aaj jaane kii zid na karo - Faiyyaz Hashmi

aaj jaane kii zid na karo
yuu.N hii pahaluu me.n baiThe raho
haaye mar jaaye.nge ham to luT jaaye.nge
aisii baate.n kiyaa na karo

tum hii socho zaraa kyuu.N na roke tumhe.n
jaan jaatii hai jab uThake jaate ho tum
tum ko apanii qasam jaan-e-jaa.N
baat itanii merii maan lo

vaqt kii qaid me.n zindagii hai magar
chand gha.Diyaa.N yahii hai.n jo aazaad hai
in ko kho kar abhii jaan-e-jaa.N
umr bhar na tarasate raho

kitanaa maasuum-o-rangiin hai ye samaa
husn aur ishq kii aaj meraaj hai
kal ki kis ko Khabar jaan-e-jaa.N
rok lo aaj kii raat ko